Hüseyin Arslan – Bao

Mi va “heya bao”
az yon sima vinon
zerre mi naleno welati sero

Bao

Piyem,
mi key ke chime ho day ra
berbune
rostiya rozi di
deste ho kerd ra
lingune ho est
mi to o waxt di
mi to o waxt zona
hama zone mi neceriyene ke vaji ‘bao!’
chi ke ala hata di hire ser guret mi key ke vake ‘bao!’
ma hao moa mi saida wey
her chi zonena
e ke o moment vira to nino
tene hora pers ke
tene rostiya chimune hora
tene tija sodirira
te ne asma pesewi de pers ke

Az zonon ke khalike mi wes nevi o waxt
Piye to beno
Az wonca zonon ke deka mi wesviye ha
A ki wesviye
Hama o waxt mi fam nekerdene ke
moa to,
deka mi se vatene, se hal u his de viye
Nika belka ae vato “hao ju torne mino bi vi Hese
laze mi aze ho keno berz
jedneno
Ya Duzgi
torne mi bexte todero
Ya Kemere Bimbareki
Hao veyva mi ju lazeko de zern ardo dina
Hizir bojiye ey bicero ma se keri”

Deka mi vana
“ero Hese piye to Smail Aga adir vi adir
Chi ke cira chik perene ra
Deste ho adir vi ha
Adir deste eydevi

Hese
Laze mi, cigeram
piye to Yismail Aga simare zof haskerdene
Ma axir hen mal u gae ma bi
tene mi u bizu
Tene ki vorek u bijeku pede kerdene
ju ki qatira mawa qire biye az qeda
tae waxt biyene har
hewsare ho visnene
worte na mergu ve genimu de ma ho dima fetelnene
kerdene gostarme

Heya sare Gewru setema hega u sindoru millet werdene ro
Beshli wontene
Zuminra mordem kistene cigeram

Ma hale ma u kesitagiye eve chor mevsimu verdene siyene ciegram
Kam ke merdene ma berdene Pule Gerise’de dardene we
Kam ke amene dina ma dawa ey kerdene dawa Xizir i ero
Chi ke aze ma niya amene pede hete verra biyene berz
Hete bin ra ki kokume ma merdene setema Pule Gerise

Vake, Dek Elif e

Ma o waxt az domone soykekvine bao
Mi thoo fam nekerdene ke Dek Elife se vana tore

Ma belka vana “Ero Hese, torne mi zofiye
Aze ma Kesistagiye’de yeno pede verra ver
Ma belka heya az bon kokim
Hao Smail Aga
Pule Gerise’de raa mi ser vineto
Vano “ere Ele be tha re, to mi virira nesona”

Piyem vake
“ere Dae,
a sene kesewa
Ere Dae,
mira laze Sim vane;
az laze Smail Againe, name ma esto”

Dek Elif e wuzara wuste ra vake

“ero Smail Aga mordemo de cher vi ro
Xarpet de toxtoru dest merd ro”

Ma bao waxt Dek Elif’e zof dergviye
hewlviye
chime ho sof rindeki vi
je chime ho zof seder nekerdene
hama yamaneviye ha
chi ke milete Kesitagiye cira vatene ‘Ela Verge’
Na turik u telise, tae waxt xashiye hen postide vi
tae waxt mal u gau de
tae waxt hen ma destu sero fetelnene.
Hen tae waxt ki siyene meymanen
Siyene lewe Besa Khude
Siyene chena ho Amik Cicege diyene Dere Xori de
Siyene che Wusene mursai Vera Niz de
Siyene Andgage
Tae waxt na tija amnoni verde hen qatira qire sero Warune Rastu de syehat kerdene wey
Na uwa Soa Heshi zof serdina waxte amnoni de
Dek Elif’e a uwera simita

Heya Bao
Ma az o waxt amune dina Kesistagiye de

Nika to vana
“ero be to bivini ro, hao bine kokim
ma merdene esta, belka miron
hao biye des serri ro
be to bivini cigeram,
welat o de ecnebiyo
durya, teynara
ne brao
ne waa
ne ki ma u pi
teynara
na amnon be to bivinime ma hao bime kokim cigeram”

Mi va “heya bao”
az yon sima vinon
zerre mi naleno welati sero
dewe sero
hard u osmen sero
hedira mi yena, ya ki nina ta, hama to mi viridera
sare mi sero cae to esto
Bao,
Mi sero vinde azo yon
Tija amnoni bena said bao

Hüseyin Arslan

Asma Wusara worteyeni, 5 April 2014, London

axiriya ho esta!