Perperıka Söe Şüka Frankfurti sero perri kuti, perrê…

Roca ra roca fuarê kıtabona. Kıtabê Heyderi “Perperıka Söe” çarnê Almanki, “Nachtfalter”. Serdo, Heyder amo, fuarê kıtabo dı meymano.

Cengiz Aslan

Heyder Karataş zê vay ama, vêrd ra, şüka Frankfurti ser ra…

Höwrê gımışi amê pêser, welatê ğeribiyê dı rocê ma hesret’a vêrenê ra.

Serdo, şüka Frankfurti tıng o tariya. Vareno, nızon sıliya, nızon ma sero ğeribiya…

Roco ra roca fuarê kıtabona. Kıtabê Heyderi “Perperıka Söe” çarnê Almanki, “Nachtfalter”. Serdo, Heyder amo, fuarê kıtabo dı meymano.

Ma taê havalo, ez, Mesut , Dr. Qereman xebera xo kerda jü, heni kêf’a nisenim tramvay, sonim fuarê kıtabo. Sonim kı taê havalê bini ki amê, ica derê. İna ki amê, pêro pia Heyderi gos danim…

Sonimı kı, hatê dı Heyder, hatê dı Mario ronistiyo. Mario be xo wayirê vetisxaniyo, kıtabê Heyderi ey do bı Almanki çarnaine.

Heyder mikrofonê xo keno xo dest, sıftı keno kıtabê xo (bı Tırki’ya) waneno: „Peyniye dı mı bı maa xu’ya xorê cao dı rınd di bı. Kê ma’o newı jü viyalekı biye. Maa mı lızgê velgi u cılıko kı kê ra ardi bı ki, herd dı fiti bı ra…

Se kı nia sıftı keno, waneno, say kı jü perda germı oncina saloni ser. Zerrı dı ma rê, kiberê dina çiroko beno ya, serd – sext teber ra xo vira beno. Dina çiroko dina teberi ra daa germa. Germa, hemı ki rındeka. Heyder kı sanıka xo rê sıftı keno, vengê xo gıno mikrofon ro, keder isani gêno. O kı qalê koti keno, ma ki iy dıma sonim. Gı rıçıkê viyalı dı, gı rao ra, gı derı – derxano ra, gı mırd gı vêsan…

Çiroka xo dewam kena: “Ni bonê ma’ê rındeki dı çirokê kı maa mı qeşi kerdênı, inon ra en rındeka xo ‘Alıki bı Fatıki’a bi.’ Ez vaci maa mı na çirokı roca Heqi qeşi kerdi bı. Taê roco jü rê ra daa zêdı qeşi kerdi bı.“ Maa mı, mı rê: ‘Perperıka mın’a sö’a rındekı’ vatênı, çirokı rê sıftı kerdênı u ekı maa mı kı na qeşiye nêvata, çirokı rê sıftı kerdo ,mı: “To perperıkı xo vira kerdı“ vatênı. Nae ser ra, maa mı dest kerdênı porrê perperıka söe ra çirokı rê newı sıftı kerdênı. ‘Perperıka mın’a sö’a rındekı. Eşti biyo, çini biyo, waxtın dı, dı wa o bıray eşti biyê, namê jüyê Alık, namê jüyê Fatık biyo“…

O kı, “Perperıka mına söe” vano, waneno, jü kêneka Almana porrkheza qıçkekı maa xo rê nia vana: “Daê, keskanê ma ki ica dı biamênı dina, eceb welatê Alıki bı Fatıki’a senêno?“ na rê “ezı ki a perperıkı ra wazon!“ vana. A kênekı verê çımonê mı dı heni bena cansenık, say kı nista perronê perperıka söe, perperıkı ae gêna, bena welatê Alıki bı Fatıki’a. Maa xo dest kena porrê kêna xo ra, “ezı ki to rê zê a ‘perperıka söe’ vıracon, kêna mı “ vana.

Heyderi dıma, Mario: (‘Mein schöner Nachtfalter’) vano, waneno. Mario Almanki dı heni wes waneno kı, to qa vanay, o ki zê a kêneka qıçkekı wazeno perronê perperıkı niso, tey sêro…

Se kı jü mordem bıros verdano pıro, quyiya zerrê xo ra keder onceno, Heyderi bı Marioy’a wand, ma quyiya zerrê xo ra ont, sımıt, bimı serımest. Rê daa: “perperıka mın’a sö’a rındekı“ vano, wandisê xo rê dewam keno. A kêneka Almana qıçkekı quca maa xo dı hewn ra sona. Sewı nia derg bena, sona…

Çıme: http://www.zazakikozmos.com/yazarlar/y/m/40/