Frankfurt de Serva Zonê Ma Amêy Pêser

Verê 15 rocan xafılde qerar da ra cı ke Dınya de Roca Zonê Ma u Pi (21.02.2014) rê roca şemiye, 22.02.2014ine de be inisyatifê Cematê Zazayanê Almanya seba Zazaki bêrê pêser u no qerar ard ca.

 
Verê 15 rocan xafılde qerar da ra cı ke Dınya de Roca Zıwanê Ma u Pi (21.02.2014) rê roca şemiye, 22.02.2014ine de be inisyatifê Cematê Zazayanê Almanya seba Zazaki bêrê pêser u no qerar ard ca. Kar u ğeyreto ewroyên de stand kerd a; namey komela Cematê Zazayanê Almanya ra sermiyan Heyder Şahini be Zazaki qısey kerd, sermiyana dıyıne Aynur Karakaşe ki fêl u emelê pêseramayışê ewroyêni u hal u weziyetê Zazakiyoke tehlıke dero, be Almanki ard ra zıwan. Dıme ra ezaê diwanê idarey Enstitüyê Zazaki Frankfurt, Mesut Keskini ki be Zazaki u Almanki, hal u weziyetê zıwanê ma sero melumati day. Oyo ke nıka Zazay biyê hemwetenê (vatandaşê, tabiyetê) Almanya, ey waşt ke hukumetê Almanya ki zıwanê ma u pi de heqa wendene bıdo Zazayan (Dımıliyan, Kırmancan). Zazay u mıletê binê ke sinoranê Tırkiya miyan de cıwiyenê, hukumetê Tırkiya heqanê zıwan u kulturi sero talim u terbiya (eğitim) de karê xo biyaro raye, çunke cihetê heqanê insaniê bıgehênan ra mecburo.

İdarey komela Cematê Zazayanê Almanya Adır Korkuti goni u ğeyretê Zazayan sero vat ke, Zazay gani teşkilatanê xoyê siyasiyan ronê, xoverdayışê kamiya xoya etnike rê wahêr veciyê, Tırkiya de ki Zazay gani siyaset de ki berzê xo ver, xora tenya be na qeyde şenê a ser finê, bıresê nışange u hedefê xo, zıwan u kulturê xo rê şenê wahêrine bıkerê. Vat ke, zerb u zor u qırkerdene, cênosidê ke Şarê Ma diyê, inan ki ma ardime halo ewroyên u heto bin ra ma wahêrê rayberanê zey Sey Rızay u Şêx Seidime, gani qedr u qıymetê ninan bızanime. Be qısay „bıcıwiyo (weş bo) bıraina şaran (mıletan)“ qalikerdena xo qedenê.

Sermiyanê cemati H. Şahini vat ke, „Zazay (Dımıli, Kırmanci) u dostê Şarê Maê ke roca ewroyêne de ma de ewro pia pay ra vınderdi, pêrıne rê teşekur kenime. İnsananê ke goni gıreynê u amey ya ki nêamey, Heq/Homa pêrıne ra razi bo.“

Hazıran miyan de akademisyen, roştber, wendoğ u nuştekarê Şarê Ma ki est biy: Dr. Kahraman Gündüzkanat, Dr. Hüseyin Çağlayan, Dr. Eberhard Werner, Birigitte Werner, Hawar Tornêcengi, Roşan Hayıg, R. Qızılçubux, Zerweş Serhad, Cengiz Aslan, Ali Kaya, Çem Estare (Zeki Çiftçi). Komelan ra ki ezaê idarey amey biy, zey Bonê Kulturê Dêsımi e.V. Darmstadt, Verein der Völkermordgegner e.V. Frankfurt (Komela verba cênosidi vınderdoğan).

Almanya de deve-deve 200 hazar nıfusa Zazayan esta u ninan ra kam ke kamiy u zıwanê xo u kalık u pirıkanê xo rê wahêr veciyeno, benê tewrê nê xoverdayışi.

Ayam serd bi, varış bi; ney ver inanê ke çetıniye diye u nêşa bêrê, elbet ke ma fehm beno. Senê ke zaniyeno, ê Zazayan zaf ked u emegê xo taê xoverdayışan u teşkilatan u partiyan de vêrdo. Taine vat, „zerri waştêne ke, ê taê teşkilatê çep u demokratê ke Zazay be giyan (can) u ruhê xo ra peşti danê cı, kaşkia (werıkna) inan ra ki taê zêde ma het de hazır bıbiyêne.“

Bınge: www.zazakikozmos.com

Editör: Asmêno Bêwayir