Hardo Şên ra o

Yinê namê aşira ho zonıtenê, yine namê aşirunê Dêsımi rınd zonıtenê.  Yinêde pir u rayvereni, kewrayeni, mısyiveni gıran viye, berz goretenê! 

Hesen Dewran

Ma u piyê ma ho zonıtenê. Yinê zonıtenê yi kamiyê!

Yinê namê aşira ho zonıtenê, yine namê aşirunê Dêsımi rınd zonıtenê.  Yinêde pir u rayvereni, kewrayeni, mısyiveni gıran viye, berz goretenê!

Venga Haqi denê, venga Xızıri denê, yinê venga jiar u diyaru denê. Yine rozê goretenê, niyaz kerdenê vıla. Yine der u ciraneni zonıtenê. Yinê roza tengede jumıni teyna nêverdenê. Hem yardım kerdenê, hem ki yardım goretenê.

Zerrê ma u piyê ma çip vi!

Sarê ho, mezgê ho zelal vi.

Kamiya ho, identiteta ho, itiqatê ho zelal vi.

Hama yê dine ki weşiya ho zof çetin viye. Barê weşiyê ho zof gıran vi, roza dine eve suxre vêrdenê ra, eve kar u gure, eve feqıreni, eve nêçareni, eve bêkeşeni vêrdênê ra.

Na nêçareniya ma xeyle khana. Na nêçareniya ma xeyle xoriya. Na nêçareniya ma qalıv ve qalıva.

Desım/Dersım. Tertelê 1938 ra têpiya mılletê ma onciya amara ho.

Onciya ame bıngehê ho ser. Onciya pir u rayverê ho naskerd, onciya mavênê ho jumini de gireda, onciya rozê ho goreti, onciya aşira ho naskerde, say kerde, pısula ha, ar u edevê ho kerd çip,  jiar u diyarê ho itiqatê ho kerd çip. Bıngêhê ho kard kerd rast, kerd çip.

Desım 1980 ra têpiya, 1990 têpiya mılletê ma roz ve roz bi parçe u purçey. Dewê hukmati kerdi tol, eve zulm, eve zor, eve hukum ma dewu ra eştime têver. Eve politik cengdaru, eve politik zalımu, eve eskerê ho, eve cengdarunê çepu (Maoistu, Kommunistu), eve cengdarunê Qurru (Kırdasu, eve PKK). Kam çızono peyde kam esto, peyde sene quwete esta, peyde beçıka kami esta? Çıkê beno marê beno.

Dewe ma ewru coka toliyê. Mılletê ma ewru coka teverrao. Dulgerunê teveridero. Mılletê ma welatê hora erjiyo tever. Esto tever. Xeriviyedero!

Nu zof kulo pilo. Na zof dırveta pila. Na dırveti her hetra zof gırana, her hetra zof xoriya.

Mılletê ma, hometa ma, sarrê ma, xelkê ma, yanê çêyê ma …….

roz ve roz bi parçey, bi parçey u purçey.

Ju parçê şi İzmir, ju parçê Estemol. Ju parçe şi Almanya, ju parçe şi Hollanda, Fransa.

Na parçê ocade (ozade) ki bi parçey purçey.

Homete biye parçey, her parçe zerre hode onciya bi parçey.

Ha halde ma sebikerime? Ma nia nêçar bımanime? Ya ki nêçariya ho kem kêrime? 

Ma sebıkeme ke nêçariya ho kem kerime?

Reyna nae sero vındeme! 

Hardo Şên