Sebeta zonê xo Viyana de amayme têlewe!

Mobet de zonê Zazaki çınay ra çı vane, çutır vane; xêle qesê vıreni, qesê khani ardi xo vira.

Viyana – “Akademiya Zazaki-Austriya”, emser ki ebe sılayiya “Bêrê zonê xo qesey bıkerime” de ju mobet ard raşte. Nu mobet, roca 18e Guciga 2016 de Wien-Amerlinghaus de bi. Xonde des u phonc isoni, u sond saete 18:00 de bi kom, zonê xo Zazaki-Kırmancki qesey kerd, zonê xo de siiri wendi, kılami vati, çhiroki ard zon ver.

Serdarê Akademiya Zazaki-Austriya Ali Dikme, meymani sılam kerdi, komelê sero malumat da. Sermiyanone komelê ra nuştoğ Hüseyin Şimşek, ju sinevizyon (diashow) kerdbi hazır, u seyr kerd. 1999 ra nat, hatam serra 2016, xonde 15 serrê de Viyana de kami ni zoni sero çı kerdo, se kerdo, i pero gegane ebe resmo, gegane ebe video musnay.

Peydona, unca sermiyanone komelê ra Süleyman Özdek çhiroki, meseli qesey kerdi. Hetê meymano ra ki xêle çhiroki, meseli amey vatene. Serdara hemdem komele (barebıroğa serokeniya) Dr. Zeynep Aslan, thambur u gitar cınıt, ebe zonê Zazaki kılami vati. İsonê ke uca rê ino ki weng kerd cı. Sermiyanone komelê ra Bülent Tosun ki ni mobet de ama diyaene.

Mobet de zonê Zazaki çınay ra çı vane, çutır vane; xêle qesê vıreni, qesê khani ardi xo vira. Ebe kay u kelebit nia pêniye arde. Herkesi jubin ra vat ke, “ni zon sero emege kami ke esto hêçe meşero”.

29.02.2016

raa-ma.com