Haberler
Kıtavo newe: Gulvang u İtıqatê Kırmancu
Ali Dikmewo ke ewro 80 (heştay) serri dero, duwayê Zazakiyê ke ma xo vira kerdê, yi saniti kağıde ro. Duwawunê Zazawunê Alewiyunê ke ey pilanê xo ra gos dê, viria xo de seveknê, nê eve savır ra nuşti.
Ali Dikmewo ke tam hakimê wendene u nuştene niyo, be qêret u qerardariya xo ra hurmeto berz u teqdir heq keno. Çiqa ke kultur, tore u baweriya Kırmancu (Zazayunê Alewiyu) rê hakimo, çiyo ke pilanê xo ra ci rê neqıl biyo u cuyo, eve şeklê fıkıriyayen u qeseykerdena xo ra sanit venuşte ro. Ali Dikme hetê qeseykerdena nêmezetmendiye ra dest eşto xo ver u fıkıriyo ke raştiya nêbiyena kulturê nuştena Kırmancu gunê endi bivurriyo, u seba tariyê tarıxi de vindibiyena nê kulturi rê jü piçik mani biyene ra qeleme gureta destê xo.
No kıtav de, waxto ke can kewt ten u hata waxto ke beden kewt binê hardi, duwayê Zazawunê Alewiyunê ke heyatê Kırmancu rê rewanê, inu tewrê jü hêkate de keno sererast. Domano sowkek ke bi, dewu de gorê adet u tore ra çi amêne kerdene u eve kamci duwawu ra tetbiqato cematki xemeliyêne?
Eke bime pil tewrê gamu ra vêrenime ra, raa heyati de zerreşayiye, nêweşiye u merdena mae, pi, bira, wae, dost u yare yena sarê ma pêrune ser; duwayê ke biriye, hesrete, umid u zerredeji sero; baweriye u tebieti sero; cematê Cemi de, veyvu u kombiyayışê şariê binu, ibadeti sero, destpêkerdena her felqe u inu rê yareniye kenê, yinu Ali Dikme mêrxasê hêkata mawa bingeyini Ferat u Şilane ve dinya u vêrdê dinu ra cêno, rasneno ma. Hêkata Ferat u Şilane de wendoği xo vênenê, peyser sonê ravêrdê xo, belkia çiyo ke viri ra şiyo, anê ra xo viri, yanê eve kilmek ra xo wanenê.
No çimewo nuşte hetê viria cemaeti u kulturê Zazayunê Alewiyu ra derecê qedr u qimeti ra nêsencino u zaf muhimo. Çiyo ke viria ma ra şiyo, teyna viria u ğeyalê ma u piyunê ma de mendo, verênde inu Anadoliye de heyatê xo de diyo, dey sero jü qısım sanito ve nuştene ro u kerdo nêmerde. Mino ke dest kerdo ve procê nê kıtavi, wazenane ke seba gurê, qêret u pheştiya Yaşar Kayaê delali, eve namewo bin ra Mirzali Zazaoğluyê delali rê zaf teşekur/sıpas bikerine. Zazaoğlu raştnuştena Zazakiyê metnê kıtavi sero, yanê heqa raştkerdişi de biyo feal. Çand dolimi metin çim ra viyarno ra u eve savır ra kerdo raşt. Piyê mino delal, Mehmet Arslan rêzunê mewzuyu, sernamu, sernamunê mavêni u raştkerdişê qısmunê kıtavi sero eve qêret u zorpesendiya xısusiye ra guriyo. Mehmet Arslan zaneno ke afernayena çımeyunê nuşteyunê ma zaf muhima. Na pheştdariya xo eve haz u hurmet ra da.
Ali Ülger, Qızılbaş Aliyo delali tawo ke no proce hesna, ver ra hetkariye u pheştdariya xo texsir nêkerde u oncia eve nê hali ra hata peyniye u eve savır ra hetê sıkıli ra ve çapkerdene rê hazirkerdena kıtavi u karê çapxaney sero yawerbiyene de biyo feal. U dergüsa Ali Dikme u Gülüstan Dikmeye Cem Enis Dikme, resmê ke kıtav derê, wayirê yinuno. No mordemo rewal senata resimi ra meşğul beno u na proce de piyê xuyo hêca teyna canêverda. Namê çiyê ke mi dekernay bi, yi ferqê heyatvênitena kıtavi u ehemiyetê destresnayena wendoğan de bi ke seba savır, seveknayene u terzê karê itimatini ra u pheştdariya yinu ra, ci rê zerri ra zaf teşekur/sıpas kenane.
Soğıno peyên de Ali Dikmeyo delali apo Ali, seba kar u gurê xo ve wendeğu rasnayene ra, tuyo ke mi rê itimadê xo ardo, ez ki to rê zaf teşekur/sıpas kenan. Nê kıtavê to ğezna zanayena sari rê raverdayene mi rê zaf muhime biye. Cemaeto ke verênde wertê tebiet de cuyo, sükanê ğerivu de kamiya xo ra kewto düri u derheqa xambiyene de tenê ciyayiye, tenê ki kamiya xuya raştikêne, zon u baweriya xo xoviriardene rê jê destcidayene jü waştena mi ki biye. Coka ke dest ve nê procey kerdene mi rê muhime biye. Seba nuştena nê kıtavi ra, eve namê xo u alvazunê kari ra to rê zaf sıpas/teşekur kenan. No çimewo ke to raver do ve viria zanayena şari vindinêbiyena kulturi u peyniye de cayê xo eve şeklê nuşteki refunê tarıxiê tozunu de guretene u namê meseriyene ra jü serkerdena pilêra; Aqil u kutıbxanewu de eve heqe ra cayê xo cêno.
Zeynep Arslan
